Santiago de Compostela, mércores 14 de outubro de 2009; Special Olympics Galicia, entidade sen ánimo de lucro que promove o deporte e o ocio entre as persoas con discapacidade intelectual, acode entre hoxe, día 14 de outubro, e o vindeiro domingo 18, a Palma de Mallorca a disputar o Campionato Europeo de Natación Special Olympics. Deportistas das asociacións Aspnais de Lugo; da asociación Nosa Señora de Chamorro, de Narón; e da Asociación San Francisco, de Vigo; serán os encargados de representar a Galicia neste encontro internacional. A expedición galega partirá cara Mallorca ás 17.15 horas desta tarde dende Lavacolla, e regresará o domingo ás 16.30, ao mesmo aeroporto.

O Campionato de Natación terá lugar nas instalacións municipais de Son Hugo e en representación de Special Olympics Galicia acoden: 4 deportistas da Asociación Aspnais de Lugo (Alejandra Quintana, Mónica López, Antonio Perejón e Sergio Dacal); 4 deportistas da Asociación Nosa Señora de Chamorro, de Narón (Aída Luaces, Eduardo López, Jose Ángel Legaspi; Guillermo Díaz); e 4 deportistas de San Francisco, de Vigo (María Alonso, Isabel Carballo, Aída Puga, Fernando Martínez).

O Campionato contará coas seguintes probas: no Grupo 1 haberá probas de 25 metros braza e mariposa; 50 metros libres, costas, braza e bolboreta; 100 metros libres, costas e braza; e relevos de 4x25 metros libres, 4x50 metros libres e 4x50 metros estilos. Para os participantes no Grupo 2 as probas serán de 25 metros libres e costas, e relevos de 4x25 metros libres. E haberá probas adaptadas para os participantes no Grupo 3 que serán de 15 metros flotación e 15 metros sen estilo nin flotación.

Os nadadores galegos competirán nas modalidades dos 25 metros libres, 25 metros costas, 25 metros braza; 50 metros libres e 50 metros costas.

Máis de 330 participantes de 34 países
O Campionato europeo de Natación Special Olympics Palma 2009 reunirá na cidade mediterránea a máis de 330 deportistas con discapacidade intelectual, acompañados de 150 adestradores, todos eles pertencentes ás distintas comunidades españolas (162 atletas españois) e 34 países de todo o mundo (con 171 participantes).

Así, estarán representadas as Comunidades de Andalucía, Aragón, Asturias, Baleares, Canarias, Castela A Mancha, Castela León, Cataluña, Estremadura, A Rioxa, Madrid, Murcia, Comunidade Valenciana e Galicia. No panorama internacional, a parte desta nutrida representación española, tamén participan deportistas chegados de Albania, Austria, Acerbaián, República Checa, Dinamarca, Finlandia, Francia, Alemaña, Xibraltar, Gran Bretaña, Hungría, Islandia, Illa de Man, Italia, República de Kirguiz, Kazaxistán, Letonia, Lituania, Luxemburgo, Malta, Mónaco, Holanda, Polonia, Rusia, San Marino, Eslovaquia, Suecia, Suíza, Turquía, Turkemistán e Ucraína.